11 ákærur móti 21 ára gomlum manni

Tað er ein long syndaskrá, sum verður løgd fyri nevningatingið í Føroya rætti 2. september.

11 ákærur eru í ákæruritinum móti einum 21 ára gomlum manni.

Maðurin er ákærdur fyri neyðtøku, neyðtøkuroynd og fyri at hava samlegu við tvær gentur, sum vóru yngri enn 15 ár.

Hann er ákærdur fyri blygdanarskemd, fyri at filma eina gentu og fyri at lata ritalin.

Minst fimm neyðtøkur

Í einari ákæru er maðurin ákærdur fyri minst fimm neyðtøkur. Tá er talan um somu gentu. 

Flestu brotini, maðurin er ákærdur fyri, vóru framd í fjør, eitt var í 2022 og eitt í 2021.

Tríggjar av teimum fýra gentunum, sum hann er ákærdur fyri at hava neyðtikið, vóru 13 ella 14 ára gamlar. 

Genturnar, sum hann er ákærdur fyri at hava samlegu við, vóru 12 og 14 ár.   

Fleiri dagar settir av

Nevningatingið í Føroya rætti byrjar mánadagin 2. september. Fimm dagar í teirri vikuni eru settir av til nevningatingið.

Nevningating er, tá kravið hjá ákæruvaldinum er minst fýra ára treytaleys fongsulsrevsing.

Maðurin var tikin í oktober í fjør og hevur verið í varðhaldi síðani.

Maðurin noktar seg sekan.