Merkið í hálvari stong við Naddoddaneystið

- Systir Karlu ringdi til mín um hálgvum sjey tíðina í gjárkvøldið. Hon var stúrin, tí ein alarmur var farin í gongd. Tyrla fór út til Naddodd, og tá var eingin vandi á ferð.

Løtu seinni komu so boðini um, at Naddoddur var holvdur, sigur Bergur Jacobsen, formaður í Naddoddafelagnum.

Karla Dana

Karla Dana, ið var 29 ár, var funnin druknað í morgun, nakrar hundrað metrar av holvda Naddoddi. (Mynd: Tróndur Enni)

- Vit kendu hesi fólkini so væl, og her er sera ringur hýrur, sigur hann.

Frá morgunstundini var nógv fólk komið saman í Naddoddaneystinum á Tvøroyri, og Merkið var í hálvari stong:

Naddoddaneystið, Naddoddur

Nógv fólk kom saman í Naddoddaneystinum frá morgunstundini. (Mynd: Sonne Smith)
 

Karla, sum Bergur Jacobsen tosar um í samrøðuni, er unga kvinnan, sum var hin einasta, ið ikki kom frá vanlukkuni við lívinum.

Karla Dana var 29 ár, úr Meksiko, men búði í Orlando í Florida, USA. Karla bloggaði um sermerktu ferðina, ið hon gleddi seg nógv til. 

Tað ber til at lesa um ferðina, sum var ein roynd at sigla opna, føroyska seksæringin Naddodd aftur til Noregs í kjalavørrinum á víkingunum, í netbóklinginum "The Viking Voyage".