Eingi tekin um, at Putin verður handtikin í Mongolia

Mongolia tók í dag móti russiska forsetanum Vladimir Putin uttan at vísa tekin um at vilja handtaka hann, hóast landið formliga hevur skyldu til tað.

Heldur enn at handtaka Putin, var skipað fyri skrúðgongu, og orkestrið hjá herinum spældi bæði mongolska og russiska tjóðsangin.

Mongolski forsetin Uknagin Kyrelsyk tók ímoti Putin á Djengis Khan-torginum í høvuðsstaðnum Ulan Bator, tá ið hann kom til landið í gjárkvøldið.

Sambært Politico, kann ICC rættarsøkja Mongolia fyri einki at gera.

Putin í Mongolia

(Mynd: Reuters/Ritzau Scanpix)

Mótmæltu við ukrainskum fløggum

Nøkur fólk við ukrainskum fløggum mótmæltu uttan fyri stjórnarbygningin, men løgreglan flutti tey av staðnum alt fyri eitt.

Mongolia er eitt av londunum, sum viðurkennir altjóða revsidómstólin ICC, sum fyri hálvumøðrum ári síðani gav altjóða boð um at handtaka Putin í sambandi við kríggið í Ukraina, fyri at hava tvingsilsflutt hundraðtals ukrainsk børn til Russlands.

Hetta er fyrstu ferð, at Putin kannar, um hann kann ferðast til eitt land, sum formliga hevur skyldu at handtaka hann, uttan at vera handtikin.