Fuglfirðingar nøgdir við barnaansing, men ónøgdir við bústaðir

Bústaðarmøguleikar eru als ikki nøktandi, fuglfirðingar eru ónøgdir við bý- og bygdarplanlegging, og so verður heldur ikki hildið, at kommunan hevur gott orð á sær aðrastaðni í landinum. 

Tað eru nøkur av úrslitunum í stóru kommunukanningini hjá Kringvarpinum og Lóðri. Økið, sum fuglfirðingar eru serliga ónøgdir við, er bústaðarmøguleikar. Har liggur Fuglafjarðar kommuna næstaftast og fær bert eitt stig meira enn Tórshavnar kommuna, sum er aftast.  

Bústaðarmøguleikar í Fuglafirði

Spurningur: " Hvussu nøgd/-ur ert tú við hesi viðurskifti: Bústaðarmøguleikar". Svarmøguleikarnir vóru á einum stiga frá 1 til 7, har 1 var "púra samd/-ur" og 7 "púra ósamd/-ur". Svarini eru síðani umroknað til ein stiga frá 0-100 - jú hægri tal, jú størri nøgdsemi. 144 fólk í Fuglafjarða kommunu svaraðu spurningunum.

Tað kemur ikki óvart á Dáva Juul, borgarstjóra, at kommunan liggur so niðarliga á bústaðarøkinum. "Hetta hevði eg roknað við", sigur hann.

Trupult er at fáa byggilendi í Fuglafirði. Tað ger, at tað er torført at finna grundstykkir, sigur borgarstjórin. Hann vísir aftur, at kommunan hevur raðfest onnur økir fram um bústaðir. 

Stuttligt at vera barn í Fuglafirði

Hóast kommunan liggur næstniðast á bústaðarøkinum, so er hon næstovast í spurninginum um tilboð til børn og ung. Á hesum økinum er tað bert Eiðis kommuna, sum stendur seg betur.

Børn og ung í Fuglafirði

Spurningur: " Hvussu nøgd/-ur ert tú við hesi viðurskifti: Vit hava góð tilboð til børn og ung". Svarmøguleikarnir vóru á einum stiga frá 1 til 7, har 1 var "púra samd/-ur" og 7 "púra ósamd/-ur". Svarini eru síðani umroknað til ein stiga frá 0-100 - jú hægri tal, jú størri nøgdsemi.  144 fólk í Fuglafjarða kommunu svaraðu spurningunum.

Í Fuglafirði eru óvanliga nógv tilboð til børn og ung, og tað hevur stóran týdning fyri trivnaðin, sigur Jóan Pauli Jacobsen, sum er lærari og høvuðsungdómsvenjari hjá ÍF.

"Fótbóltur er serliga væl umtóktur", sigur venjari flennandi. Hann vísir á, at tað eru umleið 12-14 dreingir og umleið 10 gentur á hvørjum árgangi, sum ganga til fótbólt í Fuglafirði.

Nummar eitt í barnaansing

Fuglfirðingar eru serliga nøgdir við barnaansingina.  Á hesum økinum fær Fuglafjarðar kommuna eitt umroknað miðaltal uppá 89, sum er tað hægsta í hesum spurninginum.

Kortini er hetta eitt øki, sum yvirskipað stendur seg væl í kanningini. Heilar 10 kommunur hava eitt umroknað miðaltal, ið er hægri enn 80.

Barnaansing í Fuglafirði

Spurningur: " Hvussu nøgd/-ur ert tú við hesi viðurskifti: Barnaansing". Svarmøguleikarnir vóru á einum stiga frá 1 til 7, har 1 var "púra samd/-ur" og 7 "púra ósamd/-ur". Svarini eru síðani umroknað til ein stiga frá 0-100 - jú hægri tal, jú størri nøgdsemi.  144 fólk í Fuglafjarða kommunu svaraðu spurningunum.

"Vit hava brúkt nógva orku upp á trivnað - bæði hjá børnum og starvsfólkum", fortelur Jónhild Abrahamsen, sosialdeildarleiðari, sum hevur ábyrgd av barnaansing í Fuglafjarðar kommunu.

Spurd, hvat riggar serliga væl í júst teirra kommunu, svarar Jónhild Abrahamsen m.a., at tey hava nógv útbúgvin starvsfólk. 

Í Fuglafjarðar kommunu eru tríggir dagstovnar: Barnalund, Stropin og Kambur.