![](https://kvf.fo/sites/default/files/styles/myndasavn-width/public/tey_motmala-6-denoiseai-denoise.jpg?itok=ZsA59Tuv)
- Tíðindi, mentan og ítróttur
Søkja eftir aðalstjóra til Heilsumálaráðið
![](https://kvf.fo/sites/default/files/styles/grein-ovasta-mynd/public/almannaradid_og_heilsumalaradid.jpg?itok=YNlLzb61)
Søkt verður nú eftir aðalstjóra til Heilsumálaráðið.
Bjørgfríð Ludvig hevur síðani 1. januar í ár verið fyribilssettur aðalstjóri í Heilsumálaráðnum.
Hon tók við, eftir at Aksel V. Johannesen, løgmaður, eftir løgfrøðiligari ráðgeving, gav Turid Arge, aðalstjóra í Heilsumálaráðnum, ætlanarskriv um tænastumannakanning.
Síðst í juni var avgerð tikin um, at Turid Arge fær eina átalu og fer frá sum aðalstjóri í Heilsumálaráðnum. Samstundis verður hon sett í starv sum ráðgevi í Løgmálaráðnum.
Kanningarleiðarin, Jens Nørtved, gjørdi tænastumannakanningina. Í niðurstøðuni sínari staðfesti hann, at Turid Arge hevur brotið § 9 stk. 1 í tænastumannalógini, við at seta til viks ásetingar í innlitslógini, fyrisitingarlógini og lóg um Løgtingsins umboðsmann.
Bjørgfríð Ludvig hevur verið fyribilssettur aðalstjóri síðani á nýggjárinum. (Mynd: Bjarni Árting Rubeksen)
Áramálssett starv
Nú verður søkt eftir nýggjum aðalstjóra.
Starvið er áramálasett í sjey ár við møguleika fyri leingjan í upp til trý ár.
Aðalstjórastarvið er flokkað í 39. lønarflokki sambært sáttmála millum Tænastumannafelag Landsins og Fíggjarmálaráðið.
Umframt eina mánaðarliga viðbót upp á 6.380 kr. fyri aðalstjóraleiklutin, verður veitt mánaðarlig viðbót upp á 20 prosent av grundlønini fyri áramálssetan.
Eftirlønin er 15 prosent av samlaðu lønini.