Við Klintrimús í biograf

Nú er hann her á føroyskum – teknifilmurin um Klintrimús verður sýndur í biografinum! Fyrsta sýning verður 11. oktobur í Havnar Bio. 

Klintrimús

Í samstarvi við Havnar Bio vísir Kringvarpið í næstum væl kendu søguna hjá Thorbjørn Egner um Klintrimús og hini dýrini í Vallbakkaskóginum. 

Børn og vaksin kunnu saman seta seg at hyggja og uppliva nýinnspælda teknifilmin um Dýrini í Vallbakkaskóginum við føroyskari talu. 

Søgan, sum er skrivað fyrst í fimmtiárunum, hóskar sera væl til dagsins samfelag við teimum avbjóðingum, sum vit øll noyðast at taka støðu til. Eitt nú at eta grønt og at hugsa øðrvísi. Og við vón um eitt rættvísari samfelag, har øll kunnu liva við hvørjum øðrum og ikki av hvørjum øðrum. 

Í Vallbakkaskóginum búgva nógv ymisk dýr, bæði stór og smá, við Klintrimús á odda. Hini dýrini eru m.a. tann skilagóði Skógmús-Mortan, bakarameistarin Haru-Per og Bamsu-Pól, sum er hann, ið ræður. Sjálvandi mugu vit ikki gloyma Reva-Mikkjal og Pætur Pinnagrís, sum eisini búgva í skóginum, men teir eru ikki so fittir. 

Dýrini í Vallbakkaskóginum

Seinastu mánaðirnar hevur Kringvarpið arbeitt við at týða, taka upp og leggja røddir á filmin, so øll dýrini í Vallbakkaskóginum nú tosa og syngja sum vit... á føroyskum. Og nú sleppa vit at síggja hesa kendu søguna á filmi, sum vit annars kenna so væl frá bókini og sum útvarpsleik. 

Filmurin er sera væl teknaður, og eyðkennini hjá dýrunum kenna vit øll aftur í okkum sjálvum. 

Dýrini í Vallbakkaskóginum 1

Føroyska framleiðslutoymið hevur lagt seg eftir at finna røddir, ið passa saman og hóska til persónligheitirnar. Kringvarpið hevur lagt seg eftir at fáa málførini í Føroyum við. 

Eitt nú tosar Haru-Per suðuroyarmál, bakaradrongurin er úr Klaksvík. Konan á garðinum er úr Sundalagnum. Elgurin tosar vágamál, men revurin er úr Havn. 

Allur tónleikurin er nýinnspældur og nútímansgjørdur. Sangtekstirnir eru teir somu, og orðaval og týðing annars leggja seg tætt upp at tí upprunaligu týðingini hjá Eyðuni Johannessen. 

Einki aldursmark er sett á Dýrini í Vallbakkaskóginum, og filmurin egnar seg væl til øll børn og barnsligar sálir. Onkustaðni er tað eitt sindur spennandi, eitt nú tá Reva-Mikkjal sæst fyrstu ferð. Tá hevði verið best, um tey minstu høvdu ein vaksnan við, tí Reva-Mikkjal er eitt lítið sindur revaligur í fyrstani. Filmurin er eisini frálíkur hjá vaksnum, sum minnast søguna frá barnaárunum. 

Við hesum hava vit fingið ein kærkomnan teknifilm á føroyskum til familjuna, har fleiri ættarlið saman kunnu uppliva góðu, klassisku søguna hjá Thorbjørn Egner. 

Dýrini í Vallbakkaskóginum 2

Upptøkur: Finnur Hansen
Leikstjórn: Páll Danielsen 
Røddir: Jákup Veyhe, Jensina Olsen, Jákup Dahl Wardum, Gundur Johansen, Hjálmar Dam, Sanna Bæk Hoydal, Bára B. Danielsen, Hans Pauli W. Tórgarð, Elsa Maria M.Olsen, Edvin Niclasen, Ann Chanett Danielsen, Ári B.Danielsen, Heri J. Hansen, Tollakur Djurhuus, Baldur Tróndarson, Óluva Lín R. við Streym, Ludvík Winther 
Mál: Føroyskt 
1 tíma og 15 minuttir 
Á føroyskum: 2024 

Atgongumerki, 70 kr., kunnu keypast á heimasíðuni hjá Havnar Bio.