Pensjónsaldurin verður 70 ár í 2042

Í galdandi almannapensjónslóg er ásett, at pensjónsaldurin skal fylgja gongdini í livialdrinum hjá føroyingum.

Men tað er eisini ásett, at hækkingar í pensjónsaldrinum skulu leggjast fyri løgtingið.

Nú hevur Almanna- og mentamálaráðið sent uppskot til ummælis, ið ásetir, at pensjónsaldurin árini 2035 til 2042 hækkar stigvíst úr 68 upp í 70 ár. 

Uppskotið hevur til endamáls at betra um haldførið í føroyska búskapinum og er ein liður í at tryggja, at vit eisini í framtíðini kunnu varðveita og menna okkara vælferðarsamfelag, sigur Sirið Stenberg, landsstýriskvinna í almanna- og mentamálum. 

Miðað verður eftir at fáa eina breiða politiska semju um pensjónsaldurin.

Politiskar samráðingar eru millum politisku flokkarnar, men enn er ikki komið á mál, og samráðingarnar halda fram, sigur landsstýriskvinnan. 

Sí uppskotið her. 

Sí frágreiðing um pensjónsaldur her.