Elveitingarlógin komin aftur í Løgtingið

Uppskot um elveitingarlóg er komið aftur í løgtingið, ikki úr landsstýrinum, men frá trimum andstøðutingfólkum, hvørt úr sínum flokki.

Tey siga, at í semjuskjalinum um elorku, sum landsstýrismaðurin í orkumálum, kommunurnar og SEV gjørdu 22. mars í 2022 stóð, at ein bólkur við umboðum fyri partarnar skuldi kanna, hvussu ein marknaður í søluliðinum kundi skipast. 

Hesin bólkurin handaði landsstýriskvinnuni í umhvørvismálum eitt tilmæli tann 15. desember í fjør. 

Tá uppskot um at dagføra elveitingarlógina var sent til hoyringar, var elmarknaðurin í søluliðinum við í uppskotinum.

Har stóð, at el skuldi seljast í heilsølu og smásølu.  

SEV skuldi ikki longur vera einaseljari.

Men hesin parturin var ikki við í uppskotinum, tá tað var lagt fyri løgtingið í mars í ár.

Tá landsstýriskvinnan bleiv spurd, hví so var, svaraði hon, at talan var um eina politiska avkláring. 

Tey, sum nú eru komin við uppskotinum, halda tað hava stóran týdning, at marknaðurin í søluliðinum, sum var partur av semjuskjalinum hjá landsstýrinum, SEV og Kommunufelagnum, kemur í elveitingarlógina.

Tí eru tey komin við uppskotinum, siga tey trý, Helgi Abrahamsen vegna Sambandsflokkin, Elsebeth Mercedis Gunnleygsdóttir vegna Fólkaflokkin og Steffan Klein Poulsen vegna Miðflokkin.