Íslendskir politistar verða oftari hóttir nú enn fyrr

Í Íslandi kemur tað meir og meir fyri, at politistar verða hóttir, meðan teir eru til arbeiðis. Og hóttanirnar eru ikki bert móti teimum sjálvum, men eisini móti teirra familjum.

Tað skrivar íslendska kringvarpið RÚV í dag.

Fjölnir Sæmundsson, formaður í íslendska politistafelagnum, sigur við RÚV, at talið av hóttanum móti politistum er vaksið seinastu árini, og at størsti parturin av hóttanum snýr seg um at gera seg inn á ognarlutir hjá politistum, so sum hús og bilar.

Tað er eisini vanligt, at politistar verða hóttir við, at fólk vita, hvar teir og teirra familjur búgva. Hetta hevur fingið fleiri politistar at melda seg úr fólkayvirlitinum, sigur Fjölnir Sæmundsson.

Hann sigur, at íslendska rættarskipanin ikki tekur hóttanirnar móti politistum í nóg stórum álvara. Ofta verða slík mál løgd til viks og ikki mett at vera nóg álvarslig.

Fjölnir Sæmundsson sigur tað eisini vera spell, at tað verður ført fram, at hóttanir eru bara ein natúrligur partur av arbeiðnum sum politistur.

Hann stúrir fyri, at tær mongu hóttanirnar fáa fólk at setast aftur, sum annars kundu hugsað sær at tikið eina politistaútbúgving.