Fimm tilmæli um gransking, menning og nýskapan

Ráðið fyri gransking, menning og nýskapan hevur fimm tilmæli um, hvussu gransking, menning og nýskapan kann mennast. 

Millum annað verður mælt til, at løgtingið hækkar stuðulin til gransking nógv og ásetir karmar fyri størri almennum stuðli. 

Eisini mælir ráðið til, at landsstýrið mennir eina heildarstrategi fyri nýskapan og ger átøk, sum kunnu stimbra nýskapan, millum annað skattafyrimunir hjá nýskapandi fyritøkum.

Løgd fram mánadagin

Ársfrágreiðingin fyri 2023 hjá ráðnum fyri gransking, menning og nýskapan verður løgd fram á almennum tiltaki í Smæruni í Havn mánadagin kl.14.00.

Har fara Ben Arabo, stjóri í Framtaki, og Marita Rasmussen, stjóri á Havstovuni, at skifta orð um týdningin av at menna nýskapan í Føroyum. 

Eisini verður pallborðsfundur. 

Við pallborðið sita Høgni Hoydal, landsstýrismaður í vinnumálum, Djóni Nolsøe Joensen, landsstýrismaður í granskingarmálum, Árni Skaale, fyrrverandi landsstýrismaður í fiskivinnumálum, og Erhard Joensen, formaður í vinnunevndini hjá løgtinginum.