Danmarks Radio dubbar sína nærveru í Grønlandi

DR økir nú sína nærveru í Grønlandi – í øllum førum fram til summarið. 

– Týdningurin av Grønlandi er eyðsýndur, og tað krevur eina journalistiska nærveru – ikki  bert tá týðandi gestir lenda.

Soleiðis skrivar DR í einum tíðindaskrivi, nú danski miðilin hevur gjørt av, at senda journalisturin Lasse Lindegaard til Grønlands, har hann í fyrstu syftu skal arbeiða fram til í summar, har hann skal lýsa viðurskifti í Grønlandi og Arktis.

Arbeiðssetningurin hjá journalistinum verður at hava eitt greitt fokus á tíðina fram til og eftir komandi grønlendska valið, sum verður í seinasta lagi 6. apríl.

– Grønland stendur fyri eini sera avgerandi tíð við nógvum áhugamálum, sum skulu avgera og mynda framtíðina hjá grønlendingum. Eg gleði meg at ferðast til býir og bygdir at hoyra, hvørjar dreymar og ósemjur fólkið hevur, og hvat fólk halda um vaksandi uppmerksemi frá umheiminum, sigur Lasse Lindegaard.

Tíðindamaðurin hjá DR verður væntandi upp á pláss í Nuuk longu í næstu viku, skrivar DR.