Fiskahandlar gevast at selja føroyskan laks

- Vit fara ikki longur at selja aldan fisk, sum hevur livað av tablettum, sigur Jacob Clausen, stjóri í P. Clausens Fiskahandli í Århus.

So bersøgin er Jacob Clausen, stjóri í familjufyritøkuni P. Clausens Fiskehandel í Århus, sum varð sett á stovn í 1888.

Í einum seks minuttir longum videobroti greiðir hann frá, hví fiskahandilin nú gevst at selja føroyskan laks.

Stjórin í elsta fiskahandlinum í Danmark sigur, at nú fara tey at fokusera 100 prosent upp á tann matin, sum náttúran veitir - í staðin fyri at selja alifisk.

- Hendan útsøgnin, at alifiskur livir av antibiotika, er beinleiðis skeiv, sigur Regin Jacobsen, stjóri í Bakkafrosti. Hann vísir á, at Bakkafrost hevur ikki brúkt antibiotika í meira enn 20 ár.

Síðan P. Clausens fiskahandil mánadagin boðaði frá, at handilin nú gevst at selja føroyskan alilaks, so eru tað aðrir fiskahandlar í Danmark, sum hava valt at gera tað sama. Seinasta dømið er fyritøkan Gartnergården Århus, sum sigur seg hava selt fyri yvir 500.000 krónur árliga av føroyskum laksi, meðan  
P. Clausens Fiskehandel seldi í fjør fyri 800.000 krónur av føroyskum alilaksi.

Tað harmar Regin Jacobsen, at elsti fiskahandil í Danmark nú gevst at selja føroyskan alilaks, og fyritøkan fylgir gongdini.

Regin Jacobsen vísir á, at Bakkafrost hevur ikki fingið nakran fyrispurning úr Danmark at svara nøkrum av teimum ákoyringum, sum føroyskur alilaksur fær í hesum døgum. Men stjórin vissar fyri, at føroyskur alilaksur er góður, tryggur og burðardyggur matur at eta.

Hoyr innslag í útvarpstíðundunum fríggjadagin klokkan 18: