Útflutningurin minkaði 300 milliónir kr.

Útflutningurin minkar.

Frá desember 2023 til november 2024 útfluttu Føroyar fyri 12,5 milliardir krónur.

Tað er 300 milliónir minni enn undanfarna skeið, frá desember 2022 til november 2023, skrivar Hagstovan.

Millum annað lýsi og fiskamjøl minkaðu 908 milliónir krónur.

Størri nøgdir av laksi

Men laksur var útfluttur fyri slakar 700 mió. kr. meira.

Hann fór upp um seks milliardir krónur, og er tí á leið helvtin av útflutninginum.

Ikki tí, at prísurin er so nógv betri, men nøgdin er størri. Virðið vaks 13 prosent og nøgdin 24,5 prosent.

Útflyta meira til ES og USA

Seinastu árini er útflutningurin til ES og USA nógv vaksin. 

Í dag er útflutningurin til ES tvífalt so stórur sum hann var fyri 2021. 

Útflutningurin til USA var millum 50 og 100 milliónir krónur um mánaðin árini 2014 til 2021.

Hann er nú millum 100 og 200 milliónir krónur um mánaðin, skrivar Hagstovan.