ES svarar Trump

- Og Danmark fer ikki at standa einsamalt móti hóttanunum frá Donaldi Trump um at áseta revsitoll, um Danmark ikki letur USA Grønland, sigur ES-kommisserurin við danska kringvarpið.

Hóttanin um revsitoll á danska vørur, sum vera seldar í USA, er verulig. Tað skal komandi amerikanski forsetin hava sagt í telefonsamrøði við danska forsætisráðharran Mettu Frederiksen mikudagin, skrivar DR. Samrøðan vardi í trý korter.

Dan Jørgensen, ES-kommisserur, minnir á, at revsitollurin rakar ikki bara danskar fyritøkur. 

- Vit eru Evropa, vit eru ES. Tú kanst áseta toll, men so rakar hann ES, tí vit hava felags politikk á hesum øki, sigur Dan Jørgensen í P1-sendingin hjá DR Ugens gæst.

Ikki fyrstu ferð

Dan Jørgensen, ES-kommisserur vísur á, at ES áður hevur lagt toll á vørur úr USA, sum revsing. Tá ið USA í 2018 legði revsitoll á stál og aluminium úr ES, svaraði ES aftur við 25 prosentum í revsitolli á fleiri amerikanskar vørur, - eitt nú kovboybuksur, motorsúkklur og bourbon.

Dan Jørgensen vónar tó, at tað ikki verður neyðugt í sambandi við ósemjuna um Grønland. 

- ES er fyri einum flótandi samhandli tvørtur um Atlantshav, sum øll fáa ágóðan av, sigur hann við DR.