Marco Rubio: Evropa sleppur eisini til samráðingarborðið

Evropa sleppur eisini til samráðingarborðið um frið í Ukraina, tí Evropa hevur sett tiltøk í verk ímóti Russlandi.

Tað er boðskapurin til Evropa frá amerikanska uttanríkisráðharranum, Marco Rubio, eftir samráðingarfundin við Russland í Saudiarabia í gjár.

- ES noyðist at vera við borðið eina ferð, tí tey hava eisini revsitiltøk, sum eru sett í verk. Men málið er at fáa enda á hesi ósemju á ein rættvísan, varandi og burðardyggan hátt, sum allir partar kunnu góðtaka. Hvussu fer tað at síggja út? Ja, tað er tað, sum framhaldandi arbeiðið fer at snúgva seg um, sigur amerikanski uttanríkisráðharrin.

Evropa hevur ikki gjørt nóg mikið

Og Rubio hevur eisini hug at finnast at Evropa, fyri ikki at hava megnað at gjørt nóg mikið fyri at steðga stríðnum.

- Í hálvt triðja ár, meðan henda ósemjan hevur herjað, hevur eingin annar megnað at gera nakað sum tað, ið vit sóu í dag, tí Donald Trump er einasti leiðari í heiminum, sum kann gera tað. Eingin verður settur til viks. Trump, forseti, er í eini støðu, sum hann stríðist fyri, fara undir eina tilgongd, sum kann fáa enda á hesi ósemju, segði Marco Rubio eftir fundin við russiska uttanríkisráðharran, Segej Lavrov í gjár.

Kunnar ES

Amerikanski uttanríkisráðharrin, Marco Rubio, kunnaði í gjárkvøldið fleiri ES lond um samráðingarnar, sum hann hevði við Russland í Saudiarabia í gjár.

Sambært AFP- tíðindastovuni, kunnaði hann uttanríkisráðharrarnar í Fraklandi, Bretlandi, Italia og Týsklandi. Eisini uttanríkisstjórin hjá ES bleiv kunnað um innihaldið av fundinum við Russland.