Hevur aftur fingið ætlanarskriv um uppsøgn

Mildrid á Lógv, sum var leiðari á Skálagarði, hevur aftur fingið ætlanarskriv frá Almannaverkinum um uppsøgn.

Tað eru góð tvey ár síðani, at Skálagarður, sum er heim fyri fólk við seinheilaskaða, læt upp.

Síðani hevur nógv rumbul verið um heimið í Klaksvík, sum nú stendur nærum tómt.

15 íbúðir eru á Skálagarði,  men 11 standa tómar.

Fekk boðið annað starv

Í mai í fjør varð Mildrid á Lógv frítikin frá tænastu sum leiðari á Skálagarði og send til hús. Í januar í ár varð uppsøgnin ógildað, og hon fekk boðið starv í Almannaverkinum ella eina fráfaringaravtalu.

Men Mildrid á Lógv vildi hvørki. Hon vildi aftur í leiðarastarvið á Skálagarði. 

Í dag vátta Mildrid á Lógv og advokatur hennara, Sigmund Poulsen, at Mildrid á Lógv aftur hevur fingið eitt ætlanarskriv um uppsøgn, og at tey nú arbeiða við einum hoyringarsvari.

Stjórin í Almannaverkinum, Edvard Heen, hevur onga viðmerking til málið í dag.