Trump gevur Hamas seinastu ávaringina

Amerikanski forsetin, Donald Trump, gevur nú Hamas eina seinastu ávaring.

"Tit kunnu sjálvi velja. Leyslatið allar gíslar nú, ikki seinni, og latið líkini av øllum teimum, tit hava dripið, frá tykkum, annars er liðugt hjá tykkum," skrivar Donald Trump á Truth Social.

"Eg sendi Ísrael alt, teimum tørvar, til at gera arbeiðið liðugt. Ikki ein einasti Hamas-limur skal kenna seg tryggan, um tit ikki gera, sum eg sigi," skrivar Trump.

Og hann hevur eisini eini boð til fólkið í Gasa.

"Til fólkið í Gasa: Ein vøkur framtíð bíðar tykkum, men ikki, um tit halda gíslar. Gera tit tað, eru tit deyð," skrivar hann.

Og sambært Reuters er USA nú í beinleiðis samráðingum við Hamas um at lata seinastu gíslarnar leysar. Hetta verður eisini váttað úr Hvítu húsunum.

USA hevur annars ein almennan politikk, um ikki at samráðast við yvirgangsfólk, og í USA hevur Hamas verið roknaður sum ein yvirgangsfelagsskapur síðani 1997.

Ísrael metir, at umleið 24 livandi gíslar - teirramillum amerikanski ríkisborgarin, Edan Alexander - enn sita í Gasa.