Størsta meskavídd í føroyskum trolum

Hóast svartkalvastovnurin er tann sami við Føroyar, Ísland, Eysturgrønland og vestanfyri Skotland, er loyvda meskavíddin í trolinum tann størsta í Føroyum.

Hon er 145 millimetrar í Føroyum.

Hon er minni í øllum hinum londunum.

Í Noregi og í altjóða sjógvi í NAFO-økinum er hon 130 millimetrar, í Bretlandi og í Íslandi er hon 140 millimetrar og í Grønlandi er hámarksmeskavíddin 140 millimetrar í einum parti av trolinum.

Kanada hevur tó eisini 145 millimetrar.

Ongar felags ásetingar

Og hóast stovnurin er tann sami, eru ongar felags ásetingar um fiskiskapin, millum annað um reiðskap.

Sirið Stenberg, landsstýriskvinna, hevur svarað Jóhannisi Joensen, løgtingsmanni, sum spurdi um trolfiskiskap eftir svartkalva.

Í løtuni eru ongar ítøkiligar ætlanir um at broyta reglurnar um meskastødd í fiskiskapinum við troli í føroyskum sjógvi, sigur landsstýriskvinnan. 

Hon sigur, at samskift er regluliga við Havstovuna um fiskiskapin eftir botnfiski undir Føroyum.

Spurningurin um meskavídd í troli fer at vera tikin upp.