Eingin spurdur um lukku í Føroyum

Aftur í ár eru finnlendingar heimsins lukkuligasta fólkaslag.

Finnland fær 7,7 stig av tíggju møguligum.

Hetta er áttanda árið á rað, sum Finnland er nummar eitt.

ST kunnger í dag árliga listan, World Happiness Report, við lukkuligum og ólukkuligum tjóðum.

Norðurlond eru á fýra teimum fremstu plássunum.

Noregur er nummar sjey.

Danmark var nummar eitt

Danmark, sum annars í nógv ár var nummar eitt, men ikki hevur verið tað síðani 2016, er nú nummar tvey og hevur 7,5 stig.

Síðani koma Ísland, Svøríki og Niðurlond.

Á listanum eru 147 lond. Føroyar eru ikki teirra millum. 

Niðast á listanum eru Afghanistan og Sierra Leone.

Fólk vera spurd um millum annað, hvat tey halda um korruptión, frælsi, livitíð, almannaveitingar, gávumildni og bruttotjóðarúrtøku í landi sínum.

1000 fólk vera spurd í hvørjum landi.