Vil blása lív í føroyskar sagnir

6. juni var hátíðarhald í nýggju hádeildini í Sankta Frans skúla, tá stóru listaverkini í nýggja bygninginum vóru liðug.

Tað er Heiðrikur á Heygum, fjøllistamaður, ið hevur listprýtt nýggju hádeildina, og málningarnir hava íblástur úr søgnini um, tá Guttormur í Múla og Barbara við Kvíggjá kappaðust í gandi.

Heiðrikur á Heygum hevur í nógv ár havt stóran áhuga fyri føroyskum sagnum, og leingi arbeitt við eini verkætlan at samla, lesa og granska sagnir, og at savna tær í bók og illusrtrera, myndprýða tær.

1000019361.jpg

Nýtt ljós má varpast á sagnirnar - okkara fantasyheim

Fjøllistamaðurin heldur, at stórur tørvur er á at varpa ljós á mongu, gomlu føroysku sagnirnar, og at blása nýtt lív í tær. Tí annars er vandi fyri at tær hvørva úr okkara tilvitsku og mentan.

Tær eru við til at lýsa okkara mentanararv og kensluliga arv, tí tær vórðu millum annað brúktar til at seta orð á kenslur og vandar - sorg, kærleika, øvund og girnd.

- Tí eru hesar gomlu sagnirnar bæði læruríkar, spennandi og søguliga áhugaverdar, heldur Heiðrikur.

Hann vísir á, at fantasygreinin er sera vælumtókt serliga millum ung og børn, men vit hava sjálvi nógvar spennandi søgur í Føroyum:

- Nógv hugsa ikki um, at vit hava okkara egnu fatasy-verur og sera spennandi gandasøgur í Føroyum, sum í nógvum førum taka støði í søguligum persónum. Men okkum tørva at varpa ljós á sagnirnar, og at tær verða miðlaðar á ein meira nútíðarhátt, heldur Heiðrikur á Heygum.

Verkætlanin við at geva sagnir út í bók og at myndprýða tær er ikki komin á mál enn, og henni vantar fíggjarligan stuðul. Men Heiðrikur vónar, at bókin verður veruleiki í 2026.

heidrikur_a_heygum_hevur_myndprytt_nyggju_hadeildina_i_sankta_frans_skula.jpg