Senda nýggja umsókn mánadagin

Bygdaráðið á Sandi hevði í gjárskvøldið fund um byggisamtyktina í Klivaløkshaga.

Ein nýggj umsókn um at góðkenna byggisamtyktina verður send mánadagin, sigur Kristian Oskar Henriksen, borgarstjóri á Sandi. 

Bygdaráðið noyðist at viðgera byggisamtyktina fyri økið av nýggjum, har sum nógv umstrídda vindmyllulundin skal standa, tí Umhvørvismálaráðið vildi ikki góðkenna broytingina, sum var samtykt í 2024 á fyrsta sinni. 

Avslagið merkir, at umsóknin skal gerast av nýggjum og liggja frammi til hoyring einaferð aftrat og hetta fer at seinka allari gongdini munandi. 

Kommunan hevur søkt um stytta hoyrings- og kærufreist, og hevur fingið tað stytt til eina viku til hoyring og eina viku kærufreist við tí treyt, at  bygdaráðið kunnar allar eigarar um broytingarnar.

50 eigarar eru í økinum og bygdaráðið arbeiðir við at senda skrivliga kunning til øll.

Byggisamtyktirnar mugu broytast tí ætlanin er at seta sjey vindmyllur upp vestanfyri Sands bygd. Eisini er ætlanin at gera veg úr landsvegnum millum Sand og Skopun í Klivaløkshaga.

Náttúrufriðingarnevndin í Sandoyar sýslu gav fyrst í oktober í fjør loyvi til vindmyllurnar og vegin.

Umhvørvisstovan gav í februar einum felagi, sum Jóhan í Niðristovu og onnur ætla at stovna, loyvi at byggja myllurnar vestanfyri Sands bygd. 

Loyvini, sum higartil eru givin, eru treytað av, at onnur neyðug loyvi eisini kunnu fáast til vegar.

Teirra millum eru loyvi frá Yvirfriðingarnevndini, loyvi frá Sands kommunu, og endalig avtala skal gerast við jarðareigararnar í økinum.