Útoyggjar: Mugu gera nakað við bústaðarmøguleikarnar

Ætlanin var, at Útoyggjafelagið skuldi hava aðalfund á Hotel Brandan í gjár, og fundurin varð eisini hildin. Men hann var stuttur, tí tá roknskapurin var góðkendur, var fundurin slitin, og so verður lýst til eykaaðalfund í november, har val til umboðsráðið er á skrá og val til stýrið.

Øll 16 fólkini í umboðsráðnum vóru komin saman í høvuðsstaðnum í gjár, men mett var rættast at kalla saman til eykaaðalfund, so øll fingu verið við, og tí tóku øll undir við uppskotinum hjá Óla Jákupi úr Dímun, sum hevur verið formaður øll 24 árini síðan felagið varð stovnað.

Sambært formanninum hava útoyggjarnar tað sum so gott, men har er bara ein stórur trupulleiki, sum er, at tað eru ov fá ungfólk. Og onkustaðni eru slett eingi.

Spurdur, hvat mann kann gera við tað, sigur hann, at ein máti er at gera nakað við bústaðarviðurskiftini í útoyggjunum.

- Tað eru nógv tóm hús, men tey kann mann ikki taka. Og tað eru fá hús til sølu, sigur Óla Jákup úr Dímun, formaður.

- Tí kundi tað verið ein møguleiki, um Bústaðir bygdu nakrar íbúðir í teimum ymsu oyggjunum, so fólk kunnu flyta til uttan at binda seg til stórar íløgur við at byggja sítt egna, leggur formaðurin afturat.

Trýst á leinki niðanfyri og hoyr alla samrøðuna við Óla Jákup úr Dímun, formann í Útoyggjafelagnum, sum var í tíðindunum á nátturða.