KÍ ongar evropeiskar timburmenn

KÍ vísti ongi tekin upp á evropeiskar timburmenn, tá teir fóru undir aftur føroysku landskappingina mánakvøldið.

Klaksvíkingar máttu takka fyri seg í Conference League í farnu viku, tá teir taptu ímóti Neman Grodno eftir brotssparkskapping, men mánakvøldið reistu teir seg við tryggum 3-0 sigri á B36 í Gundadali.

Hallur Hansson, Páll Klettskarð og Árni Frederiksberg skutu málini í sigrinum, sum ger, at KÍ er átta stig frammanfyri HB í bestu mansdeildini. 

Tað sá ikki gott út hjá NSÍ, tá Lars Markmanrud sá reytt longu í 3. minutti av dystinum ímóti Víkingi í Sarpugerði, og Jørgen Nielsen umsetti brotsspark til mál.

Runavíkingar reistu seg kortini í stórum stíli. Klæmint Olsen javnaði í 56. minutti og beint eftir legði Michal Przybylski NSÍ framum. Uppaftur betri gjørdist tað hjá teimum gulu, tá Klæmint Olsen skoraði til 3-1 í 71. minutti.

Víkingur gav kortini ikki skarvin yvir, og tryggjaðu sær javnleikin við málum frá Ragnari Skála og Martini Klein. NSÍ er nú tvey stig aftanfyri HB, meðan Víkingur er nummar fýra níggju stig aftanfyri runavíkingar.