Eftirlýstu kvinnurnar eru systrar

Tær komu við Atlantsflogi úr Barcelona mikudagin 27. august og blivu burtur týsdagin 2. september. Sambært løgregluni høvdu tær ikki ferðaseðil úr aftur Føroyum.

Tí útilokar løgreglan ikki, at tær eru blivnar burtur við vilja.

Løgreglan í Føroyum hevur verið í sambandi við Suðurkoreiskar myndugleikar gjøgnum Sektion for International Informationsudveksling hjá Ríkisløgregluni. Millum annað er løgreglan áhugað í at vita meira um sálarstøðuna og sosialu umstøðurnar hjá báðum kvinnunum. Men higartil hevur ikki borið til at fáa aðrar upplýsingar enn, at talan er um systrar.

Løgreglan kannar framvegis málið og arbeiðir út frá, at talan kann vera um eitt óhapp ella, at kvinnurnar eru blivnar butur við vilja.

68 ára gamli meksikanarin, sum bleiv burtur á sama stað mikudagin 3. september, er framvegis ikki funnin. Løgreglan sigur, at hann hevði ferðaseðil heim aftur, og at hann hevur vitjað í Føroyum áður.