Tyler Robinson handtikin fyri drápið á Charlie Kirk

Amerikanska samveldisløgreglan, FBI, hevur handtikið 22 ára gamla Tyler Robinson fyri drápið á politiska aktivistin, Charlie Kirk.

Tað segði Spencer Cox, guvernørur í statinum Utah, á tíðindafundi fyri lítlari løtu síðani. 

Guvernørurin segði, at tað vóru familjulimir hjá 22 ára gamla gerningsmanninum, sum vendu sær til løgregluna.

11.000 áheitanir

FBI hevur fingið fleiri enn 11.000 áheitanir frá fólki í sambandi við drápsmálið, og kanningararbeiðið heldur fram sigur samveldisløgreglan.

Drápið á Charlie Kirk hendi á einum politiskum kjakfundi framman fyri fleiri túsund fólkum á universitetinum í statinum Utah fyrradagin.

Sambært myndugleikunum var gerningsmaðurin staddur á tekjuni á einum bygningi, okkurt um 200 metrar frá Charlie Kirk. Hann brúkti eina riflu at skjóta við.

Her sæst videoupptøka av drápsmanninum, ið flýggjar frá staðnum.