Hans Enoksen er deyður

Grønlendski politikarin, Hans Enoksen, er deyður, 69 ára gamal.

Hans Enoksen hevði ein drúgva, politiska yrkisleið. Hann sat í grønlendska landstinginum, Inatsisartut, í 30 ár.

Eitt stutt tíðarskeið eftir aldarskiftið var hann landsstýrismaður í fiskivinnumálum, áðrenn hann í 2002 bleiv landsstýrisformaður. Sum formaður fyri Siumut-flokkin stóð hann á odda fyri grønlendska landsstýrinum, Naalakkersuisut, árini frá 2002 til 2009. 

Stovnaði egnan flokk

Í 2014 fór hann úr Siumut og stovnaði sín egna flokk, Naleraq.

Í 2018 bleiv Hans Enoksen valdur til formann fyri grønlendska landstingið, Inatsisartut. 

Hann stóð á odda fyri Naleraq-flokkinum til 2022, tá hann læt formanssessin víðari til Pele Broberg.

Hans Enoksen stillaði uppaftur á valinum í mars í ár, tá Naleraq fekk sítt besta val higartil við átta tinglimum. Hans Enoksen bleiv tá afturvaldur.

Sambært blaðnum Sermitsiaq var heilsan hjá Hans Enoksen farin at bila, og hann varð innlagdur á Dronning Ingrid Hospital í Nuuk, nú hann andaðist, 69 ára gamal.