Palestinskir myndugleikar fegnast um friðarátøk í Gasa

Palestinski myndugleikin sigur seg fegnast um átøkini hjá Donald Trump, forseta,  at fáa frið í Gasa. Arabisku londini eru eisini jalig.

Í eini fráboðan sigur palestinski myndugleikin, at tey fegnast um "ærligu og avgjørdu royndirnar hjá amerikanska forsetanum at enda kríggið". 

Tey siga víðari, at tey varðveita sítt "álit á hansara evni at finna ein veg móti friði".

Átta arabisk og muslimsk lond - teirra millum Egyptaland, Katar, Jordan og Saudiarabia - siga seg eisini fegnast um leiklutin og átøkini hjá Trump, skrivar NTB.

Í gjár var fundur millum Donald Trump og ísraelska forsætisráðharran, Benjamin Netanyahu, um at enda kríggið í Gasa.

Gíslarnir latast leysir

Í avtaluni skal Hamas lata allir ísraelskir gíslar leysir innan 72 tímar. Annars fer Ísrael at halda fram við bardøgunum.

Avtalan, sum USA hevur lagt fram, krevur, at Gasa verður avvápnað, og at Hamas missir alt vald. Afturfyri skal Ísrael taka seg lutvíst aftur.

Donald Trump segði í gjár, at palestinar nú mugu taka ábyrgd, og at øll arabisku londini - uttan Hamas - hava góðkent friðarætlanina. Ger Hamas ikki tað sama, fær Ísrael fullan stuðul úr USA til at oyðileggja Hamas.

Sambært Reuters skulu gislar latast leysir í umbýti við fangar, og eina altjóða herdeild skal tryggja friðin.

Hamas sigur seg nú vilja umhugsa uppskotið í “góðari trúgv”.