Jana dagsins spælari í sigri á Mariu

Jana Mittún skeyt sjey mál og legði upp til trý, tá Viborg HK vann 33-29 á Mariu Pálsdóttir Nólsoy og teimum í HH Elite fríggjakvøldið.

Jana Mittún var kosin at vera dagsins spælari á heimasíðuni hjá Viborg, meðan Maria Pálsdóttir Nólsoy eisini gjørdi vart við seg fyri Horsens við fýra málum upp á fimm royndir.

Viborg var frammanfyri allan dystin, og hóast Horsens nærkaðist viðhvørt, kom sigurin ongantíð veruliga í vanda. 

Í morgin møta tær báðar og restin av landsliðshópinum hjá Føroyum til venjing við Tjarnir, áðrenn leiðin gongur til Ísland, har fyrsti EM-undankappingardysturin hjá hondbóltskvinnunum er á skránni ímóti Íslandi.

Leygardagin spæla Føroyar á heimavølli ímóti Montenegro.