Heini í Skorini helt bestu røðuna í Danmark

Heini í Skorini hevur vunnið heiðurin Årets Danske Tale.

Hann hevur fingið virðislønina fyri røðuna, sum hann helt á endaliga galladøgurðanum hjá Summarskúlanum hjá Rahbek í juli í ár.

Tað skrivar Danske Taler í tíðindaskrivi.

Í røðu síni vísir Heini í Skorini millum annað á eina nýggja hóttan móti fólkaræðinum, sum ikki kemst av sensuri, men av larmi.

Í røðuni viðger Heini í Skorini talufrælsið nú og trýstið, sum tøknirisarnir í Silicon Valley leggja á fólkaræðið.

Millum annað verður víst á, at vit ofta gloyma yvirsædda og meira introverta tvíburan hjá talufrælsinum - sum er kunningarfrælsið. Rætturin at taka ímóti og leita sær vitan og sannleika.", skrivar Heini í Skorini í røðu síni.

Drukna í uppsløgum og klikkum

"Vit drukna í uppsløgum, klikkum, filmsbrotum sum fara víða, og hálvum sannleikum, meðan týðandi og álítiandi upplýsingar hvørva. Øll rópa, men eingin verður klókari."

Dómsnevndin sigur millum annað, at:

"Røðan skarar framúr við sínum sermerkta teksthandverki og sínum evnum at miðla ein greiðan hátt fløkt hugskot við einum óvanliga høgum upplýsingarstigi fyri tekstaslag."

Heini í Skorini er lektari í altjóða politikki á Fróðskaparsetrinum.

Sjúrður Skaale, fólkatingsmaður fyri Javnaðarflokkin, fekk í fjør heiðurslønina Årets Danske Tale fyri sína røðu á fólkatingi undir endaorðaskiftinum í fjør.