Løn undir útbúgving: Fáa 50 prosent av byrjunarlønini

Avtala er nú gjørd um løn undir útbúgving fyri heilsuhjálparar, heilsurøktarar og námsfrøðiligar hjálparar.

Kommunala Arbeiðsgevarafelagið, Fíggjarmálaráðið og tey trý fakfeløgini - Heilsuhjálparafelag Føroya, Heilsurøktarafelagið og Føroya Pedagogfelag hava skrivað undir avtalu, sum ásetir, at starvsfólk við útbúgvingarsáttmála verða lønt við 50 prosentum av byrjanarlønini fyri ávikavist útlærdar heilsuhjálparar, heilsurøktarar ella 
námsfrøðiligar hjálparar.

Eisini eru ásetingar um gjøld fyri ólagaliga arbeiðstíð, eftirløn, frítíð og barsil partur av avtaluni.

Lógin  um heilsuhjálpara-, heilsurøktara- og námsfrøðiliga hjálpara útbúgving varð broytt í vár, soleiðis at tey, sum gera ein útbúgvingarsáttmála við ein arbeiðsgevara um at fara undir eina av nevndu útbúgvingum, kunnu fáa løn undir útbúgving.

Lógin ásetur ikki, hvørja løn 
starvsfólk við útbúgvingarsáttmála skulu hava, men partarnar á arbeiðsmarknaðinum skulu samráðast um lønina.

Samráðingarnar hava verið drúgvar, men í dag hevur eydnast pørtunum at gera semju um avtalu, sum kemur í gildi 1. november.

Sí avtaluna her