Skiftið: Hjálp!

Skiftið er poddrøð í 9 pørtum um skiftisárini hjá kvinnum. Tíðin, sum kann vera buldraslig og kaotisk hjá nógvum kvinnum. Vit tosa við serfrøðingar, og føroyskar kvinnur siga frá sínum hugsanum og upplivingum við skiftisárum.

Fjórði partur er í útvarpinum í dag klokkan 17.05 og eitur 'Hjálp'. Tú finnur allar partarnar í røðini her. 

Tabu gera framvegis sítt til, at nógvar ganga einsamallar við ampunum

Tað er ein sannroynd, at alt ov nógvar kvinnur ikki leita sær hjálp fyri teir ampar, sum kunnu standast av skiftisárum. Annaðhvørt tí tær ikki vita av, at har er hjálp at heinta, ella tí at tær halda, at soleiðis er tað bara, tá tú kemur í hendan aldurin.

Ein, sum hevur hjálpt kvinnum í nógv ár eftirhondini, er Katy við Skipá, sum í sínum starvi sum farmakonomur á apotekinum hevur staðið aftan fyri skivuna og vegleitt:

Tað er framvegis eitt tabu at tosa um skiftisárini, tí meðan summar tora at spyrja um hjálp, so vilja aðrar tryggja sær, at onnur fólk ikki eru í nánd, tá tær skulu tosa um tað, sum bilar.

Liða- og vøddapína, hitatúrar, svøvnloysi, trupulleikar við undirlívi og húð eru millum trupulleikarnar, sum kvinnur kunnu fáa í skiftisárum, og góð ráð eru at heinta á apotekinum fyri tað mesta av hesum:

Har eru fleiri kvinnur, sum koma at leita sær hjálp, tí vit tosa meira opið um tað nú, og tað er gott, tí kvinnur hava tað absolutt ikki gott, tá tær koma í skiftisárini og í tíðini aftaná.

Tó so, leggur hon afturat, so eru kvinnur ikki nóg væl upplýstar enn, og tað royna tey at gera nakað við á apotekinum, tí tey hava júst framleitt ein faldara við teimum vørum, sum tey hava, ið kunnu hjálpa.

Hetta, at tú kanst fara á apotekið og leita tær hjálp fyri ampa av skiftisárum, er ikki nakað, sum panelið hesa ferð hevur hugsað stórvegis um. Gunnvá Zachariasen, Sigrun Danielsen og Elin Heðinsdóttir Joensen halda avgjørt, at kunning er eitt, sum manglar, tá tað snýr seg um ta hjálp, sum er at fáa.

skiftid_4.png

Hvat: Skiftið
Hvar: Í útvarpinum og á KVF Ljóð
Nær: Týsdagar kl. 17.05, og tá tað passar tær á KVF Ljóð