Við Tórði á túri rundar 365 sendingar – “ein sannur merkisdagur” 

Árið hevur roynst framúr væl í seyðahaldinum í Tjørnuvík

Við Tórði á túri hesa ferð vitjar Tórður í Tjørnuvík, har seyðahaldið hevur verið óvanliga gott í ár. Tað hevur gingið so væl, at menn í bygdini knapt minnast líknandi ár. Í Sjeyndum eru lomb, ið ongantíð hava fingið nakað afturat, farin upp um 50 pund, og fleiri hava ligið ovarlaga í 40-unum. Hetta er í sjálvum sær eitt tekin um røkt, skynsemi og kanska eitt sindur av hepni, siga røktingarmenninir. 

Steinbjørn Magnussen, røktingarmaður í Sjeyndum, greiðir frá úrslitinum saman við Dávuri Emil Hansen, røktingarmanni í hagapartinum Ytsta Triðingi. 

Í sendingini hoyra vit eisini røddirnar hjá eldru ættarliðunum. Vit fáa orðið á 95 ára gomlu Thoru Magnussen, og ein annan tjørnuvíking, Birgir Davidsen, sum eigur hálva mørk í haganum. 

við tóri á túri í Tjørnuvík

(Mynd: Tórður Mikkelsen) Dávur Emil Hansen, røktingarmaður í Ytsta Triðingi.

við tóri á túri í Tjørnuvík

 (Mynd: Tórður Mikkelsen) Steinbjørn Magnussen, røktingarmaður í Sjeyndum.

Nógvir góðir túrar farnir aftur um bak 

Tórður Mikkelsen hevur verið vertur fyri sendingini Við Tórði á túri í góð seks ár. Hann hevur vitjað bygdir og býir kring landið við mikrofonini og varpað ljós á gerandisdagin hjá fólki. 

Fyrsta sendingin var í Funningsfirði í september 2013, og Tórður hevur lovað, at enn fleiri túrar skulu nokk koma. 

Á KVF Ljóð ber til at hoyra allar túrarnar hjá Tórði, og í dag kl. 17.05 er partur nummar 365 at hoyra í útvarpinum.