HM-Trok #1: Pernille klár at berjast við Brnovic

Í morgin byrjar søguligt HM-endaspæl. Føroysku hondbóltskvinnurnar leggja til brots við dysti ímóti Montenegro, sum í nógv ár hava talst millum tíggju tey bestu í heiminum.

Fyri bara seks vikum síðan, spældu somu lið ein spennandi EM-undankappingardyst, sum Montenegro vann eftir javnleiki í steðginum.

Føroyski liðskiparin Pernille Brandenborg er enn einaferð til reiðar at berjast ímóti krútsterku Tatjanu Brnovic á strikuni, meðan Marianna Eystberg skal royna seg í einum endaspæli fyri fyrstu ferð.

Ingi Olsen er eisini á kringvarpsliðnum hesa ferð, og hann verður ivaleyst nokkso fastur gestur í HM-trokinum. Hann sigur sína hugsan, og tað ger dótturin, Rannvá Olsen eisini.