Ikki meiriluti í samgonguni at stytta arbeiðsvikuna við lóg

Arbeiðsvikan skal styttast niður í 37 tímar.

Tað var eitt tað størsta vallyftið hjá Javnaðarflokkinum og Tjóðveldi til seinasta løgtingsval. 

Eitt trípartasamráðingarráð var sett at arbeiða við málinum.

Niels Winther og Óluva í Gong

Niels Winther og Óluva í Gong í Breddanum fyrrapartin. 

Óluva í Gong, forkvinna í felagnum føroyskir sjúkrarøktarfrøðingar, og Niels Winther, stjóri í Vinnuhúsinum, sum hava verið partur av arbeiðnum, hava tó hvør sína tulking av, hvussu stytta arbeiðsvikan skal fremjast í verki.

Óluva í Gong undrast á, at stytt arbeiðsvika verður lovað í valstríðnum og  skrivað í samgonguskjalið, men so frættist einki aftur.

Óluva í Gong og Niels Winther vóru í Breddanum fyrrapartin:

Ikki undirtøka í samgonguni

Vit hava boðið Aksel V. Johannesen, løgmanni, í útvarpsstovuna at tosa um málið, men løgmaður svarar, at hann ikki er tøkur til samrøðu.

Løgmaður sigur tó í sms-boðum, at undirtøka er ikki í samgonguni at stytta arbeiðsvikuna við lóg.

Javnaðarflokkurin heldur framvegis, at tað er neyðugt at stytta arbeiðsvikuna og vónar, at tað verður sett hol á tilgongdina í hesum valskeiðnum, skrivar Aksel V. Johannesen í sms-boðunum.

Nú landsstýrið verður umskipað, verða arbeiðsmarknaðarmál partur av almanna- og heilsumálum, og tí verður tað uppgáva hjá Margit Stórá, sum 1. desember tekur við sum landsstýriskvinna á hesum málsøkinum, at loysa málið fyri valið.

Allur Breddin kann hoyrast her.