Dystardagur 2: Spania fyri skotum

Spania kom væl frá byrjan í HM-kappingini við tryggum sigri á Paraguai í fyrsta umfari í bólkaspælinum mikudagin.

Dysturin móti lægst styrkismetta liðnum í bólkinum endaði við 26-17 sigri til spaniólar, sum eftir eina javna byrjan hevði tamarhald á dystinum.

Vinstri bakkurin Danila So Delgado-Pinto, sum telist millum lyklaspælararnar, var toppskjútti við seks málum, meðan vongurin Ona Vegué I Pena skoraði fimm ferðir.

Meir av tí sama

Var strikuspælarin hjá Montenegro Tatjana Brnovic tung at danska við, skulu føroyingarnir vænta sær uppaftur størri mótstøðukvinnur í kvøld. 

Strikurnar hjá Spania hava lyklaleiklut í álopsspælinum, har tær skapa pláss til kviku bakspælararnar, men tær eru seinar, tá tær skulu renna aftur í verjuna, sigur Ingi Olsen, hondbóltsviðmerkjari.

 - Tey spæla nógv inn til strikuspælarin, og tá hon hevur skotið, er hon ikki serliga skjót heim í verjuna, og tær vilja eisini skifta út, segði Ingi Olsen í GMF.

 - Eg giti, at vit koma at leggja uppaftur størri dent á at spæla skjótt fram í kontraspæli. Vit koma buldrandi fram í fyrsta bylgju og aðru bylgju, og vit skulu helst sleppa ígjøgnum beinanvegin, segði viðmerkjarin. 

Vóru í heimstoppinum

Spania er komið til heimsmeistaraskapið styrkismettar næsthægst í føroyska bólkinum. 

So seint sum í 2019 rukku spaniólar í HM-finaluna, men í tveimum teimum seinastu royndunum hava úrslitini verið 5. og 13. pláss.

 - Vit koma til HM við góðum treysti, sigur venjarin Ambros Martin við IHF.

 - Vit tóku nógvar nýggjar spælarar við til Olympisku leikirnar í París og í seinasta EM-endaspælinum komu vit ikki í miðumfarið, men kenslan var sera góð kortini. Í Trier skal menningin halda fram, so vit fáaminuttir, royndir og stig fyri stig, so Spania aftur verður millum heimsins bestu lond.