Bøtur fara nú í landskassan

Frá í dag koma sektir - ella bøtur, sum tær verða nevndar á gerandismáli - í landskassan á yvirtiknum málsøkjum.

Tað var 17. juni í fjør, tað vil siga í 2025, at danska stjórnin og Føroya landsstýri skrivaðu undir avtalu, sum inniber, at sektir ella bøtur skulu býtast millum ríkiskassan og landskassan.

Undantak í hesi avtaluni eru inntøkur, sum stava frá handhevjingini hjá løgregluni í Føroyum av ferðslulógini. Tær skulu framhaldandi í danska ríkiskassan, hóast at ferðslulógin er heimtikið málsøki.

Lógarbroytingar, sum eru gjørdar í samband við avtaluna, fáa gildi í dag, 1. januar 2026.