Kursvirðið á Føroya Banka farið upp tríggjar milliardir

Kursurin á partabrævinum hjá Føroya Banka heldur fram at hækka, og í gjár fór hann fyri fyrstu ferð upp um 300.

Um middagsleitið í gjár gjørdi kursurin eitt rend uppá 308, men hann fór niður aftur á 302, áðrenn hann móti endanum av handilsdegnum kreyp uppaftur á 307, har hann endaði, tá handilsdagurin í gjár endaði.

Virðið næstan tvífaldað

Hetta hevði við sær, at Føroya Banki nú hevur eitt kursviðið uppá tríggjar milliardir krónur, og tað er næstan tvífalt so nógv, sum bankin var verdur um ársskiftið 2024-2025.

Tá var kursurin 162 og virðið eina milliard og 555 milliónir krónur, í gjár var kursurin 307 og virðið tvær milliardir og 947 milliónir krónur.

Landsstýrið eigur 35 prosent av bankanum, og tað merkir, at parturin hjá landinum er farin upp um eina milliard krónur. Fyri einum góðum ári síðan var parturin hjá landinum verdur eina góða hálva milliard, so uppá gott og væl eitt hálvt ár er parturin hjá landinum øktur eina hálva milliard í virði.

Parturin hjá Gulaki Madsen verdur 740 mió.

Gulak Madsen eigur 25 prosent av partabrøvunum, og hansara partur er nú 740 milliónir krónur verdur. Tað er 350 milliónir krónur meira enn nýggjársaftan 2024, tað vil siga fyri einum góðum ári síðan.

Nú keypskálin er latin uppaftur í dag, heldur kursurin í Føroya Banka fram at hækka. Fyrrapartin er partabrævið handlað fyri næstan kurs 319, og tað vil siga, at kursvirðið á Føroya Banka er farið upp um tríggjar milliardir krónur.