Skriva undir semju um lønarkarm í dag

Seinnapartin í dag fara tey 12 fakfeløgini á almenna arbeiðsmarknaðinum, Lønardeildinar hjá Fíggjarmálaráðnum og Kommunala arbeiðsgevarafelagið væntandi at skriva undir semju um lønarkarm.

- Øll 12 fakfeløgini eru samd um lønarkarmin, segði Súni Selfoss, formaður í Starvsfelagnum, við útvarpið mikudagin í síðstu viku.

Ein serfrøðingabólkur gjørdi grundarlagið undir samráðingunum um lønarkarmin, og partarnir hava samráðst síðani tíðliga í desember í fjør.

Tey 12 fakfeløgini eru Starvsfelagið, Akademikarafelagið, Búskapar-  og løgfrøðingafelagið, Yrkisfelagið, Kost- og føðslufelagið, Farmakonomfelagið, Yngri læknar, Ljóðsmøðrafelagið, Fysioterapeutfelagið, Pharmadanmark, Heilsurøktarafelagið og Føroya tekniska lærarafelag.

Lønardeildin hevur sáttmálar við 30 fakfeløg.

Kommunala arbeiðsgevarafelagið hevur sáttmála við 16 fakfeløg, men tey eru ikki øll á almenna arbeiðsmarknaðinum.

Nøkur eru á privata arbeiðsmarknaðinum.