Fara nú at út- og umbyggja Listasavnið

Listasavn Føroya hevur í samstarvi við Landsverk skrivað undir sáttmála við Búsetur um útbyggja og umbyggja Listasavnið.

Nú sáttmáli er undirskrivaður, kann farast undir byggiarbeiðið, og tað skal eftir ætlan vera liðugt á vári 2028, sigur Listasavnið.

Út- og umbyggingin framtíðartryggjar karmarnar hjá savninum og skapar betri umstøður fyri gestir, listina og starvsfólk. Verkætlanin fevnir um nútímansgerð av verandi bygningi umframt nýggj øki, sum geva betri møguleikar til framsýningar, læring og tiltøk.

Solveig Hanusardóttir Olsen

Stórt og gleðiligt

- Sáttmálin er eitt stórt og gleðiligt stig í einari verkætlan, sum vit hava arbeitt miðvíst við í longri tíð. Vit síggja fram til eitt gott samstarv við Landsverk og Búsetur um at skapa bestu karmar fyri listina og fyri okkara gestir, sigur Solveig Hanusardóttir Olsen, stjóri á Listasavninum.

Savnið er opið fyri almenninginum, meðan um- og útbyggingin fer fram.

Arbeitt hevur verið við eini nýggjari uppseting av føstu framsýningini, og hon letur upp nú. Í hesum sambandi verður eisini skipað fyri eini røð av tiltøkum, har gestir fáa høvi at fylgja menningini og uppliva savnið á nýggjan hátt.

Einmælt samtykt í tinginum

Løgtingið samtykti einmælt løgtingslóg um stuðul til byggiverkætlanina, og stuðul er játtaður frá Augustinus Fonden, Louis-Hansen Fonden, Villum Fonden og Tórshavnar kommunu.

Byggiverkætlanin verður framd í tøttum samstarvi millum Listasavnið og Landsverk.

Les meira um byggiverkætlanina her