Trýstir sørvingar tryggjaðu sær FM eftir fimmsettara

SÍ er føroyameistari í flogbólti við kvinnum eftir spennandi 3-2 sigur á Mjølni í seinnu FM-finaluni, sum var á Giljanesi í dag.

Sørvingar vunnu fyrru finaluna í Klaksvík mikukvøldið, og við fyrimuni á 'heimavølli' á Giljanesi, var SÍ favorittur at avgera alt í dag.

Tað gjørdist ikki lætt kortini. Mjølnir vann nevniliga tvey tey fyrstu settini, og ta løtuna bendi nógv á, at neyðugt fór at verða við avgerandi triðju finaluni í Klaksvík, men varð kortini ikki.

Sí reisti seg nevniliga og javnaði til 2-2, áðrenn sørvingar vunnu 15-12 í javnbrótaranum og fóru avstað við dystinum og meistaraheitinum.

Hetta var sætta føroyameistarahetið, kvinnurnar hjá SÍ hava vunnið. Tað fyrsta vunnu tær í 2008.