Móttøkuflokkurin í Skúlanum á Fløtum verður av ongum

Ætlaði móttøkuflokkurin í Skúlanum á Fløtum verður av ongum.

Tórshavnar kommuna hevur gjørt av, at frítíðarskúlin skal hava hølini, sum vóru ætlað móttøkuflokkinum, sigur Regin Marnersson, skúlastjóri, við Skúlablaðið.

Móttøkuflokkar eru til teirra, sum hava føroyskt sum annaðmál.

Okkurt um helvtin av teimum, sum hava brúk fyri undirvísing í føroyskum sum annaðmál í Suðurstreymoy, eru í Skúlanum á Fløtum, ella á leið 80 næmingar. 

363 næmingar brúk fyri undirvísing

Tøl hjá Undirvísingarstýrinum frá september í fjør vísa, at 363 næmingar í 40 skúlum hava brúk fyri undirvísing í føroyskum sum annaðmál. 

Tórshavnar kvøldskúli hevði móttøkuflokk við øllum fólkaskúlanæmingum í miðstaðarøkinum. Men tað tilboðið helt uppat í 2023.

Í løtuni eru tríggir móttøkuflokkar, í Runavíkar kommunu, Eysturkommunu og Fuglafjarðar kommunu.

Og móttøkuflokkur fyri ukrainsk flóttabørn er í Eysturskúlanum í Havn.

Tá eingin móttøkuflokkur er, fáa næmingarnir undirvísing í smærri bólkum eftir tørvi og aldri, skrivar Skúlablaðið.