Tíggju nýggj andlit vald á ting

Føroyskur politikkur fekk eitt nýtt stjørnuskot, tá farið varð undir uppteljingina í kvøld. Hon er bara 20 ára gomul, gott og væl, og fekk tilsamans 972, sum svarar til góð 16 prosent av atkvøðunum hjá flokkinum. Tað er eitt rættiliga gott val, má sigast.

Men hon var ikki tann einasta nývalda í dag, tí saman við henni vóru níggju onnur nývald. Ikki øll eru ókend í politikki, men fleiri eru. Onkur hevur sitið í landsstýrinum, onkur annar hevur sitið í landsstýrinum og løgtinginum fyri ein annan flokk, og onkur triði hevur bara fingið eitt nýtt politiskt lív.

Fólkaflokkurin fekk trý nýggj umboð á ting; Fróði Magnussen endaði á sætta plássi hjá Fólkaflokkinum við 499 atkvøðum, Bill Justinussen, sum fyrr hevur umboðað Miðflokkin, fekk 445 og Grímur Sundstein, sum ikki hevur verið valdur fyrr, fekk 354 atkvøður.

Tjóðveldi fekk eisini trý nýggj umboð á ting, Bjørg Brynhildardóttir Egholm hava vit longu nevnt, Liljan Weihe, sum fekk 452 atkvøður og endaði á fjórða plássi, og Jóhan Christiansen, sum fekk 307 atkvøður og endaði á sætta plássi.

Sambandsflokkurin fekk tvey nýggj umboð á ting; Atli F. Johansen, sum varð valdur við 558 atkvøðum og endaði á fjórða plássi,  og Sunnvá Dahl Høgfeldt, sum varð vald við 368 atkvøðum og endaði á sætta plássi. Hvørgin teirra hevur sitið á tingi fyrr.

Javnaðarflokkurin fekk eitt nýtt umboð, sum heldur ikki hevur sitið á tingi áður, og er tað Ben Arabo, sum fekk 955 atkvøður og endaði næstovastur á javnaðarlistanum.