Lønarsamráðingarnar verða tiknar uppaftur

Lønardeildin hevur fingið heimild frá nýggja landsstýrismanninum í fíggjarmálum, Aksel V. Johannesen, at fara í gongd aftur við lønarsamráðingarnar.

Tær steðgaðu annars upp, tá løgtingsvalið varð útskrivað. 

Nøkur fá viðurskifti skulu tó fáast upp á pláss afturat, áðrenn samráðingarnar byrja, sigur Jan Sjóstein í stuttari viðmerking.

12 fakfeløg á almenna arbeiðsmarknaðinum hava gjørt ein leist fyri karmin, og avtalað er longu, at lønin hjá teimum skal hækka 3,87 prosent  fyrsta árið, og síðan er ein útrokningarleistur gjørdur, sum tekur hædd fyri framleiðsluøking og prístalinum, tá ið næstu lønarhækkingarnar koma. 

Jan Sjóstein sigur, at nú skal avtalast við feløgini, nær tey koma til samráðingar. Hann sigur, at avtalur verða gjørdar fyrsta dagin.

Hann sigur eisini, at avtalað var longu gjørd við onkur av teimum 12 feløgunum um víðari samráðingar, tá ið val varð útskrivað, og at nærliggjandi er, at samráðst verður fyrst við hesi feløgini.