Tekur undir við at gera tveir eldradeplar í Suðuroynni

Býráðið á Tvøroyri tekur undir við heildarætlanini fyri Bú- og heimatænastuna í Suðuroynni.

Ætlanin sigur, at næstu tíggju árini skal eldraøkið í Suðuroynni savnast í tveimum eldradeplum, einum í norðaru og einum í sunnaru helvt.

Býráðið samtykti eisini, at umsitingin hjá kommununi fær heimild til at arbeiða víðari við at kanna  staðsetingar og karmar fyri einum nýggjum eldradepli á Tvøroyri.

Í ætlanini verður serliga víst á, at eldraøkið í Suðuroy hevur stórar avbjóðingar.

Trot á hóskandi bústaðarloysnum

Tey eldru gerast fleiri og fleiri, trot er á hóskandi bústaðarloysnum, starvsfólkatrot er, tænastustigið er ójavnt, og fíggjarliga trýstið er stórt.

Arbeiðsbólkurin, sum gjørdi uppskotið um heildarætlan, mælir til sjey átaksøki, millum annnað fyribyrging og endurmenning, hóskandi bústaðir, at fólk eru heima sum longst, fakliga dygd og nærvera og leiðsla, samskifti og samstarv. 

Í eldradeplunum skulu vera røktarheim, íbúðir, dagtilhald, venjingar- og felagshølir og aðrar felags tænastur.