Eingin føroyingur í Hormuz hevur biðið um hjálp

Eingin føroyingur í Hormuzøkinum hevur biðið borgaratænastuna hjá danska uttanríkisráðnum um hjálp.

Tað sigur Bárður á Steig Nielsen, landsstýrismaður, sum hevur svarað Bjarna Kárason Petersen, løgtingsmanni, ið spurdi um støðuna hjá føroyingum í Persaraflógvanum.

Føroyska uttanríkistænastan samstarvar við danska uttanríkisráðið um mál um borgaratænastu til føroyingar úti í heimi. 

Í tílíkum málum er meginreglan tann, at fólk, sum hava brúk fyri hjálp, ráðgeving ella øðrum tænastum, venda sær beinleiðis til uttanríkistænastuna ella danska uttanríkisráðið. 

Enn er eingin fyrispurningur um borgaratænastu frá føroyingum í Hormuzøkinum skrásettur, sigur Bárður á Steig Nielsen.

Vinnumálaráðið upplýsir, at einki skip í føroysku skipaskráunum er í Hormuzsundinum ella innan fyri tað. 

Føroyskir myndugleikar vita ikki, hvørjum skipum føroysk sjófólk sigla við, ella hvar skip við føroyskum sjófólkum eru stødd. 

Les svarið her.