Seks vilja vera deildarleiðari á Sernámi

Seks fólk hava søkt starvið sum deildarleiðari á Sernámi.

Tað gjørdist greitt, tá umsóknarfreistin var úti í gjár. Tað skrivar Skúlablaðið á heimasíðu síni.

Sernám hevur verið sjálvstøðugur stovnur, men síðan 1. juni hevur stovnurin verið ein deild undir Undirvísingarstýrinum. Tað er í tí sambandi, at søkt hevur verið eftir leiðara, sum skal standa á odda fyri deildini.

Í lýsingini varð sóknast eftir einum framskygdum og eldhugaðum leiðara, sum skal leggja dent á strategi, menning og samskapan.

- Deildarleiðarin fer at vera partur av leiðslubólkinum í Undirvísingarstýrinum og skal virka fyri, at bygnaðarliga tilgongdin at skipa økið av nýggjum ber á mál. Tætt samstarv er millum Undirvísingarstýrið og Nám á fleiri økjum, og leiðarin fær uppgávuna at styrkja knýtið til Nám í sambandi við námsfrøðiliga menning og ráðgeving, skrivar Skúlablaðið.

Undirvísingarstýrið verður skipað við trimum fakdeildum, ein fyri KT, talgilding og menning, ein fyri útbúgvingar, dygd og tænastur og nú ein fyri sernámsfrøðiliga økið. 

Starvið verður sett frá 1. august.