Iran ætlar at umsita Hormuzsundið

Høvuðssamráðingarleiðarin hjá Iran, Mohammad Bagher Ghalibaf, sigur, at Teheran fer at umsita Hormuzsundið, skriva almennir iranskir miðlar

Í gjár varð kunngjørt, at USA og Iran eru samd um eina ætlan, sum innan 60 dagar, skal føra til endaliga friðaravtalu.

Sambært leiðandi samráðingarmanninum hjá Iran eru londini samd um at fáa samskiftisskipan um skipaferðsluna í Hormuzsundinum, fyri at sleppa undan ósemjum.

Ghalibaf segði við almennu tíðindastovuna Irna, at Hormuzsundið ongantíð vendir aftur til umstøðurnar undan krígnum, og at sundið verður umsitið av Islamiska Lýðveldinum Iran, sambært altjóða lóg.

Í gjár segði amerikanski forsetin, Donald Trump, at Hormuzsundið er "víðopið", men kom eisini við eini ávaring:

- Heldur Iran seg ikki til avtaluna, so geri eg tað, sum eg skal gera, segði Trump.