Eyðun og Atli halda fram til 2029

Eyðun Klakstein og Atli Gregersen halda fram sum venjarar hjá føroyska manslandsliðnum í fótbólti. 

Venjarin og hjálparvenjarin hava gjørt nýggjan sáttmála við Fótbóltssamband Føroya, sum er galdandi til og við 2029. Magni Mohr, Jákup Reinert Højgaard og Géza Tamás Turi halda eisini fram í venjaratoyminum, skrivar heimasíðan hjá Fótbóltssambandinum.

 - Tað er ein stórur heiður at sleppa at halda fram sum landsliðsvenjari. Eg eri takksamur fyri stóra álitið frá FSF og glaður fyri, at vit halda fram við sama venjaratoymi. Vit gleða okkum til uppgávurnar, sum liggja fyri framman, sigur Eyðun Klakstein sambært fsf.fo.

Undir Eyðuni Klakstein fekk fótbóltslandsliðið metgóð úrslit í fjør. Føroyar vunnu tvær ferðir á Gibraltar, og í oktober eydnaðist at vinna 4-0 á Montenegro, áðrenn Kekkia varð sent av Tórsvølli við 2-1 tapi í viðførinum. Eitt hitt besta úrslitið hjá manslandsliðnum yvirhøvur.

Gamli sáttmálin var galdandi árið út, og Eyðun Klakstein hevur sagt, at hann vildi hava hann avgreiddan áðrenn Nations League byrjar í heyst, og nú hevur FSF tryggjað sær venjaran næsta trý árini.

 - Vit eru sera fegin um, at tað hevur eydnast at leingja samstarvið við Eyðun og restina av venjaratoyminum. Teir hava víst stórt arbeiðssemi og fakliga dygd, og vit hava álit á, at teir kunnu halda fram við menningini av føroyska manslandsliðnum, sigur Christian F. Andreasen, forseti í FSF.