Samkoma fær ókeypis nýtslurætt til nýggju kirkjuna á Argjum

Fyrr í hesi vikuni gav Bárður á Steig Nielsen, landsstýrismaður í mentamálum, kirkjuráðnum á Argjum loyvi til at fara undir arbeiðið at byggja nýggja kirkju á Argjum.

Men tað verður ikki bara kirkjan, sum fær nýggj høli. Missiónsvirksemi verður eisini í nýggju kirkjuni á Argjum.

Í 2021 varð ein samstarvsavtala undirskrivað millum Argja kirkjuráð og Stýrið fyri Kirkju- og missiónshúsið á Argjum.

Samstarvsavtalan millum Argja kirkjuráð og Stýrið fyri Kirkju- og missiónshúsið á Argjum tryggjar, at virksemið hjá missiónshúsinum kann halda fram í nýggju kirkjuni.

Høvuðsinnihaldið í avtaluni er, at stýrið fyri Kirkju- og missiónhúsið letur kirkjuráðnum gomlu ognirnar hjá Kirkju- og missiónshúsinum sum part av fíggingini av nýggju kirkjuni. Samstundis verður ásett, at kirkjuliga missiónsarbeiðið framhaldandi skal hava atgongd til hølini.

Avtalan gevur stýrinum fyri Kirkju- og missiónshúsið ókeypis og tíðaróavmarkaðan nýtslurætt til nýggju kirkjuna, og at hesin rætturin skal tinglýsast sum ein servituttur ella ítak á matriklinum hjá nýggju kirkjuni.

Kirkjuráðið hevur ábyrgdina av rakstri og viðlíkahaldi av hølunum, meðan nærri reglur skulu avtalast í einari serstakari reglugerð um, hvussu hølini skulu nýtast, og sum partarnir í felag samtykkja.

Sáttmálin kann bert sigast upp undir ávísum treytum. Kirkjuráðið kann bara siga avtaluna upp, um stýrið fyri Kirkju- og missiónshúsið í álvarsligan mun ikki heldur sínar skyldur. Hinvegin kann stýrið fyri missiónshúsið siga sáttmálan upp við seks mánaða freist.

Samstarvsavtalan varð undirskrivað í desember 2021, og er síðani tinglýst. Tað merkir, at nýtslurætturin er skrásettur á ognina, og er sostatt eisini galdandi fyri framtíðar eigarar av kirkjuni.

Kringvarpið hevur í dag roynt at fingið eina viðmerking frá Bárði á Lakjuni, landsstýrismanni í mentamálum, men hann hevði ikki møguleika at gera viðmerkingar í dag.

Vit ætlaðu at spyrja hann, um tað er í samsvari við reglurnar, at ein samkoma fær ókeypis nýtslurætt til ognir hjá fólkakirkjuni, og um aðrar samkomur í somu støðu kunnu gera eina líknandi avtalu.