KAF veit einki um lógarfesta neyðtilbúgving fyri starvsfólk á eldraøkinum

Formaðurin í Kommunala arbeiðsgevarafelagnum kennir einki til nakra ætlan um lógarfesta neyðtilbúgving fyri starvsfólk á eldraøkinum. 

- Tað eigur heldur ikki at vera neyðugt at lóggeva slíka tilbúgving. Tað mugu partarnir sjálvir finna útav, sigur Per Martin Gregersen.

Í gjár søgdu frá forkvinnan í Heilsuhjálparafelagnum, Mary Antonsdóttir, og forkvinnan í Felagnum føroyskir sjúkrarøktarfrøðingar, Óluva í Gong, í almennum skrivi, at boð eru komin úr Fíggjarmálaráðnum, at tey eru farin at gera eina yvirskipaða orðing um neyðtilbúgving í sambandi við møguligan arbeiðssteðg.

Óluva í Gong og Mary Antonsdóttir

Forkvinnurnar siga, at tær ongantíð fara at finna seg í eini lógarfestari neyðtilbúgving.

Fyri summarfritíðina slitnaðu samráðingarnar millum Heilsuhjáparafelagið og KAF. Og nú eru 11 mánaðir, síðani sáttmálin fór úr gildi.

Sambært Per Martini Gregersen, var tað - sum ikki einaferð - lønarspurningurin, sum skilti partarnar.

Hoyr innslag í útvarpstíðindunum: 

Sí eisini: Eingin avtala verður við Fíggjarmálaráðið um neyðtilbúgving

Enn er ikki avtalað, nær sáttmálasamráðingarnar millum Kommunala arbeiðsgevarafelagið og Heilsuhjálparafelagið verða tiknar uppaftur.